Улаанбаатар хотын 2040 он хүртэлх хөгжлийн төлөвлөгөөний төсөлд Улаанбаатарын хөгжлийн бүсүүдийн чиг үүргийг тодорхойлж, нийгэм, эдийн засаг, соёл боловсрол, хөдөө аж ахуй, хүнс, хөнгөн үйлдвэрлэл, тээвэр логистик, аялал жуулчлалын чиглэлээр төрөлжүүлэн хөгжүүлж, үйлдвэрлэлийг бий болгож, цаашид 193 мянган ажлын байрыг шинээр бий болгохоор тусгасан.

          Энэхүү зорилтод хамгийн их оролцоо бүхий дагуул хотууд, эдийн засгийн тусгай бүсүүд болон үйлдвэрлэл, технологийн паркуудын удирдлага, төлөөлөл нартай хамтарсан уулзалтыг 2025 оны 04 дүгээр сарын 11-ний өдөр Нийслэлийн Ерөнхий Архитектор болон Хот байгуулалт, хотын стандартын газраас зохион байгуулав.

         Хөгжлийн бүсүүдийг уялдаа холбоотойгоор дэмжин хөгжүүлснээр нийслэлийн хүн амын төвлөрлийг сааруулах, үйлдвэрлэл, ажлын байр болон орлогын шинэ эх үүсвэрийг бий болгох, логистик тээврийн ачааллыг оновчтой хуваарилах, нийслэлийн төдийгүй улсын эдийн засгийн бүтцийг төрөлжүүлж, гадаад худалдаа экспорт нэмэгдүүлэх, бүс нутгийн тэнцвэртэй хөгжил хангагдаж, эдийн засгийн бүтээмж нэмэгдэх онцгой чухал ач холбогдолтой юм.